Լիբանանի պետական եւ զինուորական-ապահովական կառոյցները արագօրէն վերականգնելու ջանքերու ծիրին մէջ, կառավարութիւնը նախանցեալ օր իր գումարած նիստին ընթացքին ամբողջացուց զինուորական եւ ապահովական բարձրաստիճան պաշտօնատարներուն նշանակումը: Տեղեկատուութեան նախարար Փօլ Մըրքոս յայտնեց, թէ զօրավար Ռուտոլֆ Հայքալ նշանակուած է լիբանանեան բանակի հրամանատար, Ռաէտ Ապտալլա՝ ներքին ապահովութեան ուժերու ընդհանուր տնօրէն, զօրավար Էտկար Լաոնտոս՝ Պետական անվտանգութեան ծառայութեան ընդհանուր տնօրէն եւ զօրավար Հասա Շուքէյր՝ Ընդհանուր անվտանգութեան ծառայութեան ընդհանուր տնօրէն: Կառավարութիւնը համաձայնած է նաեւ բանակին համար զինուորագրել 4500 նոր կամաւոր: Նիստին ընթացքին, հանրապետութեան նախագահ Ժոզէֆ Աուն շեշտած է, որ մօտէն կը հետեւի Սուրիոյ զարգացումներուն եւ լիբանանեան սահմանային շրջաններուն ցցուած վտանգներուն: Խօսելով բարեկարգումներուն մասին, հանրապետութեան նախագահը շեշտեց, որ նախարարաց խորհուրդը կը մտադրէ վաւերացնել բարեկարգումները, յիշեցնելով որ երկրին մէջ որոշումներ կայացնելու պարտականութիւնը վերապահուած է կառավարութեան, ոչ թէ կուսակցութիւններուն կամ յարանուանութիւններուն:
