Եւրոմիութեան, Գանատայի, Մեքսիքայի եւ այլ երկիրներու դէմ Միացեալ Նահանգներու նախագահ Տոնըլտ Թրամփի յայտարարած մաքսային տուրքերու եւ վճարներու պատերազմին առումով, Գանատայի Ելեւմուտքի նախարարութիւնը յայտարարեց, թէ այսօր նոր տուրքեր պիտի սահմանուին ամերիկեան որոշ արտադրանքներու նկատմամբ, որպէս հակադարձութիւն Թրամփի յայտարարած անտրամաբանական եւ չարդարացուած քայլերուն: Գանատական տուրքերը կը վերաբերին մասնաւորաբար ամերիկեան համակարգչային եւ մարզական արտադրանքներու ոլորտին: Սպիտակ տունը, միւս կողմէ, Օթաուան զգուշացուց ամերիկեան սահմանային շրջաններուն գանատական ելեկտրամատակարարումը դադրեցնելու հաւանական ծրագրերէն, պնդելով որ Գանատա պիտի վճարէ նման արարքի մը սուղ գինը:
Եւրոմիութեան յանձնակատարին գրասենեակը իր կարգին յայտարարեց, թէ պիտի հակադարձէ ամերիկեան մաքսային տուրքերուն, առանց բացառելու այս նոր խնդիրը բանակցութեամբ լուծելու հնարաւորութիւնը: Կը կարծուի, թէ եւրոպական տուրքերուն նոր փաթեթը պիտի հասնի 26 միլիառ եւրոյի:
