Իսրայէլեան բանակը երէկ մեծ հարուած հասցուց Սուրիոյ հարաւի սահմանային Սուէյտա գաւառին մէջ գտնուող օդային խարիսխի մը: Իսրայէլի պաշտպանութեան նախարար Իսրայէլ Քաց յայտնեց, որ իրենք կը մտադրեն անժամկէտ մնալ Սուրիոյ հարաւային բռնագրաւեալ շրջաններուն մէջ: «Երբ Սուրիոյ նախագահը ամէն առտու բանայ իր աչքերը, պիտի տեսնէ, որ մենք իրեն կը դիտարկենք Շէյխ լեռան մեր դիրքերէն», ըսաւ Քաց, նշում կատարելով սահմանային բարձր լեռան, որուն սուրիական հատուածին վերջերս տիրապետեց իսրայէլեան բանակը՝ մինչեւ Դամասկոսի գիւղական շրջաններ դիտարկումը դիւրացնելու եւ բարելաւելու նպատակով: Իսրայէլացի նախարարը նշեց, թէ նախանցեալ օր 40 թիրախ ռմբակոծած են Սուրիոյ հարաւային շրջաններուն մէջ՝ առ ի գործադրութիւն հաւանական սպառնալիքները կանուխ չէզոքացնելու Թել Աւիւի քաղաքականութեան:
Իսկ Թուքիոյ Պաշտպանութեան նախարարութենէն պատասխանատու մը «Ռոյթըրզ»ին յայտնեց, որ ռազմական գործողութիւնները կը շարունակուին Սուրիոյ հիւսիսային շրջաններուն մէջ աշխուժացող քրտական կազմակերպութիւններուն նկատմամբ:
