Ամերիկեան եւ սէուտական միջնորդական նախաձեռնութեամբ, անցնող երեք օրերուն բազմացան Ուքրանիոյ մէջ զինադադար յայտարարելու եւ հակամարտութեան վերջ տալու ուղղութեամբ լուրջ աշխատանք տանելու ջանքերը: Ուքրանիոյ նախագահութիւնը յայտարարեց, թէ համաձայնած է 30 օր զինադադար յայտարարելու Ուաշինկթընի առաջարկին: Միացեալ Նահանգներու նախագահ Տոնըլտ Թրամփ յայտնեց, որ դրական նշաններ ստացած է Ուքրանիոյ մէջ զինադադար յայտարարելու վերաբերեալ, նշելով որ իր ուքրանացի պաշտօնակիցը պիտի հրաւիրէ Սպիտակ տուն եւ հաղորդակցի Ռուսիոյ նախագահին հետ: «Գնդակը այժմ Ռուսիոյ մօտ է եւ ուղարկեցինք պատուիրակներ, մաղթելով որ շուտով յայտարարուի զինադադար», ըսաւ Թրամփ: Ուքրանիոյ նախագահ Վոլոտիմիր Զելենսքի շեշտեց, որ բանակցութեան մէջ իրենց համար կարմիր գիծ են Ուքրանիոյ բռնագրաւեալ հողերը, որոնք պէտք չէ ենթակայ ըլլան ռուսական գերիշխանութեան: «Մենք տեղական ռազմարդիւնաբերութեան միջոցներով կը հակադարձենք ռուսական հարուածներուն: Ան որ պատերազմը սկսաւ պէտք է ակնկալէ հակադարձութիւն», շեշտեց Զելենսքի: Իսկ Ռուսիոյ արտաքին գործերու նախարար Սերկէյ Լաւրով շեշտեց, որ իրենք կը մերժեն ՆԱԹՕ-ի ուժերու ներկայութիւն Ուքրանիոյ մէջ, այդ համարելով Ռուսիոյ ազգային անվտանգութեան սպառնալիք: Ռուսական բանակն ալ յայտարարեց, թէ ուքրանական ուժերը քաշուած են Ռուսիոյ սահմանային Քուրսք նահանգի հինգ դիրքերէ, որոնք վերջերս գրաւած էին սահմանային ներթափանցումի գործողութիւններով:
