Իրանի արտաքին գործերու նախարար Ապպաս Արաղժի յայտնեց, որ արաբ պատուիրակ մը շուտով հիւլէական բանակցութիւններուն վերաբերող ամերիկեան նամակ մը պիտի հասցնէ Թեհրան: Միաժամանակ արաբական լրատուամիջոցներ հաղորդեցին, որ նախագահ Տոնըլտ Թրամփի նամակը Իրան պիտի հասցնէ Արաբական Միացեալ Էմիրութիւններէն պատուիրակ մը: Իսկ իսլամական յեղափոխութեան գերագոյն առաջնորդ այաթոլա Ալի Խամինէի կարծիք յայտնեց, թէ բանակցային սեղան նստելու ամերիկեան առաջարկը պարզապէս հանրութիւնը մոլորեցնելու փորձ մըն է: Նախագահ Մասուտ Փեզեշքեանն ալ շեշտեց, որ նոյնիսկ ճնշումի տակ կը մերժէ բանակցիլ ամերիկացիներուն հետ: Ամերիկեան բանակային ջանքերուն զուգահեռ, Չինաստանի Արտաքին գործերու նախարարութիւնը յայտարարեց, թէ 14 Մարտին Թեհրանի եւ Մոսկուայի հետ խորհրդակցութիւն պիտի կազմակերպեն Փեքինի մէջ՝ քննարկելու համար Իրանի հիւլէական թղթածրարին զարգացումները:
