Արտաքին գործերու նախարար Եուսէֆ Ռեժժի զարմանք յատնեց Հըզպալլայի զէնքին վերաբերող իր յայտարարութիւններուն նկատմամբ կուսակցութեան ընդհանուր քարտուղար շէյխ Նայիմ Քասէմի բուռն հակադարձութեան առնչութեամբ: «Կառավարութիւնը իր աշխատանքային ծրագրին մէջ յանձնառութիւն յայտնեց բռնագրաւեալ հողերու ազատագրութեան՝ քաղաքական եւ դիւանագիտական միջոցներու գործածութեամբ, նկատի ունենալով այլընտրանքի բացակայութիւնը», ըսաւ Ռեժժի եւ շեշտեց, որ Հըզպալլայի առաջադրած դիմադրութեան ընտրանքը Լիբանանը մղած է այսօրուայ ծանր վիճակին: «Եթէ Հըզպալլա իր գերագոյն հզօրութեան օրերուն չկրցաւ կանխել իսրայէլեան խախտումները, ապա այսօր ինչպէ՞ս պիտի կարենայ իրագործել այդ առաքելութիւնը», հարց տուաւ արտաքին գործերու նախարարը: Ան Հըզպալլան ամբաստանեց նոր իրավիճակին հարցով «ջայլամի քաղաքականութիւն վարելու եւ իրականութիւնները անտեսելու» մէջ, շեշտելով որ երկրին գերագոյն շահերէն կը բխի Հըզպալլայի զէնքին փոխանցումը օրինական ուժերուն:
