Հանրապետութեան նախագահ Ժոզէֆ Աուն Պաապտայի նախագահական պալատին մէջ ժողով գումարեց հարաւային զինադադարի համաձայնութեան գործադրութեան հետեւող միջազգային յանձնախումբի անդամներուն հետ եւ պահանջեց ճնշում բանեցնել Իսրայէլի վրայ, որպէսզի գործադրուին բանաձեւին բոլոր յօդուածները եւ Իսրայէլ քաշուի սահմանային բռնագրաւեալ հինգ բարձունքներէն: Ժողովէն ետք, Եգիպտոսի դեսպանը վստահեցուց, որ իրենք աշխատանք կը տանին արագացնելու սահմանային բռնագրաւեալ կէտերէն իսրայէլեան ուժերու նահանջը: Հանրապետութեան նախագահութիւնը յայտարարեց նաեւ, թէ իսրայէլեան ուժերը այսօր ազատ պիտի արձակեն ու Լիբանանին յանձնեն լիբանանցի մը, որ գերեվարուած էր երկամսեայ պատերազմին ընթացքին եւ արգելափակուած էր իսրայէլեան բանտի մէջ: Այս մասին յայտարարեց Հանրապետութեան նախագահութինը՝ գերեվարուած չորս լիբանանցիներու ազատ արձակումէն ետք: Գերիներու փոխանցումը տեղի ունեցաւ Նաքուրայի ծովեզերեայ սահմանային անցակէտին մօտ, ուրկէ ազատ արձակուած լիբանանցիները Կարմիր խաչի մեքենաներով ուղղուեցան հիւանդանոց՝ բժշկական անհրաժեշտ քննութիւններ կատարելու համար: Իսրայէլի վարչապետ Պենիամին Նեթանիահու իր կարգին յայտնեց, թէ Լիբանանի, Միացեալ Նահանգներու եւ Ֆրանսայի հետ համաձայնութիւն գոյացած է կազմելու սահմանային կէտերուն տարակարծութիւնները լուծող յանձնախումբ մը: Այսուհանդերձ, իսրայէլեան ուժերը կը շարունակեն խախտել Լիբանանի գերիշխանութիւնը եւ թիրախներ հարուածել հարաւի եւ Պեքաայի մէջ: Բանակին բանբերը նախանցեալ օր յայտնած էր, թէ օդային միջոցներով թիրախաւորած ու սպաննած է Հըզպալլայի հակաօդային պաշտպանութեան համակարգերու պատասխանատուՀասան Ապպաս Իզզըտտինը:
Լիբանանեան բանակի հրամանատարութիւնը յայտարարեց, թէ լիբանանեան զինուորական խումբ մը սահմանի լիբանանեան հաստուածէն վերացուցած է փշաթելը, որ իսրայէլեան ուժերը քանի մը օր առաջ տեղադրած էին, հատելով սահմանը եւ ոտնակոխելով լիբանանեան գերիշխանութիւնը: Ըստ բանակին, իսրայէլեան ուժերը նաեւ հողակոյտ բարձրացուցած են սահմանային Ռմէյշ գիւղին մերձակայ լիբանանեան բանակի դիրքին կից:
