Արժոյթի միջազգային հիմնադրամը ներկայացնող պատուիրակութիւն մը Պաապտայի պալատին մէջ տեսակցեցաւ հանրապետութեան նախագահ Ժոզէֆ Աունի հետ, քննարկելու բարեկարգումներու դիմաց Լիբանանին ելեւմտական աջակցութիւն ցուցաբերելու ծրագրերը: Պատուիրակութիւնը նախագահին առաջարկեց Լիբանանի մէջ մշակել ելեւմտական բարեկարգումներու մէկ ու ամբողջական ծրագիր մը: Ելեւմուտքի նախարար Եասին Ժապէր յայտնեց, որ դրամատնային աւանդները ջնջելու մասին խօսակցութիւն չկայ, այլ կը քննարկուին աւանդները վերադարձնելու միջոցները: «Կառավարութիւնը յանձնառու է անհրաժեշտ բարեկարգումներու որդեգրումին, ոչ թէ արտաքին ճնշումի հետեւանքով, այլ որովհետեւ երկիրը կարիք ունի նման փոփոխութեան», վստահեցուց Ժապէր: Նշենք, որ հանրապետութեան նախագահը երկրին զարգացումները եւ կառավարութեան գործունէութիւնը արծարծած էր վարչապետ Նաուաֆ Սալամի հետ առանձնազրոյցին ընթացքին:
