Իսկապէս եզակի երեւոյթ է Լիբանանի հայութեան թէ աշխարհատարած Սփիւռքի մէջ, որ իր կեանքին 90-րդ սահմանին մօտեցող տարիքին՝ Մկրտիչ Պուլտուքեան հայորդին շարունակէ մասնագիտական թէ պատմական բազմալեզու գիրքեր հրատարակել, ներկայացնել տեղական թէ միջազգային գիրքերու ցուցահանդէսներուն…:
Լիբանանի Կեդրոնական դրամատան նախկին փոխկառավարիչը, միջազգային տնտեսագէտ, ֆինանսագէտ, համալսարաններու դասախօս եւ բազմաթիւ աշխատութիւններու հեղինակ մեր բազմատաղանդ հայրենակիցը իր բազմահազար ընթերցողներուն եւ պատմաբան-ֆինանսագէտներուն կը ներկայանայ իր բազմարժէք «Հայ սեղանաւորները Օսմանեան Կայսրութեան մէջ» եռալեզու հրատարակութեամբ՝ լիբանանեան գիրքի 42-րդ փառատօնին, որ տեղի պիտի ունենայ Անթիլիասի «Մար Իլիաս» եկեղեցւոյ գլխաւոր դահլիճին մէջ:
Հինգշաբթի, 6 Մարտ 2025-ի յետմիջօրէին, ժամը 5-ին, «Անթիլիասի Մշակութային Շարժում» կազմակերպութեան այս փառատօնի նախաձեռնութեան գլխաւոր հովանաւորը Լիբանանի Հանրապետութեան նորընտիր նախագահ Զօր. Ժօզէֆ Աունն էր:
Իսկ յառաջիկայ 14 Մարտ 2025-ին, յետմիջօրէի ժամը 3-5 Մկրտիչ Պուլտուքեանի պատուին պիտի կազմակերպուի «Հայ սեղանաւորները Օսմանեան Կայսրութեան մէջ» եռալեզու հատորներու մակագրութեան արարողութիւն, հեղինակին կողմէ:
Երկրագունդի չորս ցամաքամասերու վրայ բազմաթիւ խորհրդաժողովներու մասնակցած, պետութիւններու կողմէ (նաեւ Մայր Հայրենիքի) հրաւիրուած դրամատնային թէ ֆինանսական համակարգերը բարելաւելու միտումով անգնահատելի աշխատանքներ իրագործած Լիբանանի հայ տնտեսագէտ- ֆինանսագէտը, նաեւ վերոյիշեալ հատորները կը նուիրաբերէ հայ նոր սերունդին՝ ծանօթացնելու հայ մեծագոյն սեղանաւորներու կեանքն ու գործունէութիւնը, երեք ցամաքամասերու վրայ տարածուած, երբեմնի հզօր Օսմանեան Կայսրութեան մէջ: Նաեւ այն ողբերգական իրողութիւնը, որ այդ մեծահարուստ սեղանաւորներուն հսկայական նիւթական թէ ֆինանսական կարողութիւնները յափշտակուեցան եւ իւրացուեցան Հայոց ցեղասպանութեան դահճապետներուն եւ մերօրեայ թրքական հանրապետութիւն կոչուած բռնատէրերու կողմէ:
Կը շնորհաւորենք Մկրտիչ Պուլտուքեանը, մաղթելով քաջառողջութիւն ու երկա՜ր տարիներ եւս հայ թէ լիբանանցի ժողովուրդին ծառայութեան մէջ:
Հ.Մ.
Նկարը՝ Լիբանանի Մշակոյթի նախարար Ղասսան Սալամէ եւ տիար Մկրտիչ Պուլտուքեան լիբանանեան գիրքի 42-րդ փառատօնին:
