Ապահովական զարգացումներուն առումով, Մարդկային իրաւունքներու սուրիական դիտարանը յայտարարեց, թէ շուրջ 1070 քաղաքացի զոհուած է Սուրիոյ ծովեզերեայ շրջաններուն մէջ անցեալ շաբաթ տեղի ունեցած բախումներուն եւ զինեալ յարձակումներուն հետեւանքով: Յիշեցնենք, որ սուրիական ապահովական եւ զինուորական ուժերը անցեալ շաբաթ գործողութիւններու ձեռնարկեցին Լաթաքիա եւ Թարթուս նահանգներուն մէջ, ուր Ասատի փլուզուած վարչակարգը ամբաստանեցին արտերկրեայ օգնութեամբ ապահովական ուժերը թիրախաւորելու եւ յեղաշրջումի փորձ կատարելու մէջ: Ընդդիմադիրները սակայն կը պնդեն, որ նոր իշխանութեան ուժերը եւ անոնց օժանդակող իսլամական զինեալ կազմակերպութիւնները յարձակած են ալաուի գիւղերուն վրայ, հրկիզած են տուներ, գողցած են ինքնաշարժներ, թալանած են հաստատութիւններ եւ կոտորած են ամբողջ ընտանիքներ՝ ներառեալ կիներ, տարեցներ ու երեխաներ, տեղի ունեցածը համարելով ալաուիներու կոտորած:
Երէկ բախումներ տեղի ունեցած են նաեւ Հալէպի մէջ: Սուրիոյ Պաշտպանութեան նախարարութեան բանբերը յայտնեց զինուորական լայնածաւալ գործողութեան աւարտը, վստահեցնելով որ կարելի եղած է ճզմել նախկին վարչակարգի մնացորդացին մշակած անակնկալ գրոհը: Այլ գիծի վրայ, սուրիացի բանբերը յայտնեց, թէ Սուրիոյ ժողովրդավարական ուժեր քրտական կազմակերպութիւնը յարձակում գործած է Հալէպի Աշրաֆիէ թաղամասի ճակատին վրայ, ուր ընդհարումներ եղած են բանակին հետ: Նշենք որ Աշրաֆիէն կը համարուի Հալէպի քրտաբնակ գլխաւոր շրջանը եւ կը գտնուի հայաշատ Վիլաներ, Նոր Գիւղ եւ Սուլէյմանիէ շրջաններուն մօտ:
Սուրիոյ անցումային շրջանի նախագահ Ահմատ Շարաա անդրադարձաւ երկրի արեւմտեան շրջաններուն մէջ տեղի ունեցած խնդիրներուն սակայն մերժեց խօսիլ յանցագործներուն ինքնութեան մասին: Ան մտավախութիւն յայտնեց, որ ծովեզերքի միջադէպերը կրնան ազդել իշխանութեան գծած ուղեգիծին վրայ:
ՄԱԿ-ի ընդհանուր քարտուղարի բանբեր Սթեֆան Տիւժարիք Անթոնիօ Կութերեշի անունով մտահոգութիւն յայտնեց Սուրիոյ մէջ նկատուած արիւնալի մագլցումին առնչութեամբ, կոչ ուղղելով անյապաղ վերջ տալու արիւնահեղութեան եւ պատժելու յանցագործները: ՄԱԿ-ի ընդհանուր քարտուղարը կարեւորած է անցումային արդարութիւնը եւ ամբողջական հաշտութիւնը՝ յանուն մնայուն խաղաղութեան: Ան պահանջած է նաեւ Սուրիոյ մէջ երաշխաւորել անկախ լրատուամիջոցներուն եւ միջազգային իրաւապաշտպան կազմակերպութիւններուն գործունէութիւնը:
Իրանի Արտաքին գործերու նախարարութիւնը դատապարտեց սուրիական արիւնահեղութիւնը եւ քաղաքացիներուն թիրախաւորումը: Ֆրանսայի եւ Գերմանիոյ արտաքին գործերու նախարարները եւս դատապարտեցին Սուրիոյ մէջ իրագործուած սպանդները, պահանջելով անյապաղ վերջ տալ քաղաքացիներու թիրախաւորումին:
