Սուրիոյ նախագահութիւնը յայտարարեց, թէ անցումային փուլի նախագահ Ահմատ Շարաա եւ Սուրիոյ ժողովրդավարական ուժեր քրտական կազմակերպութեան ղեկավար Մազլում Ապտի ստորագրած են համաձայնութիւն մը, ըստ որուն, քրտական ինքնակառավարման բոլոր հաստատութիւնները կը միաձուլուին Սուրիոյ պետութեան հետ՝ ներառեալ օդակայանները, սահմանային անցակէտերը եւ ուժանիւթային ենթակառոյցները: Համաձայնութիւնը կը համարուի կարեւոր քայլ մը՝ Սուրիոյ քիւրտերուն հետ առնչուած խնդիրներու լուծումին ուղղութեամբ: Շարաա յայտնեց նաեւ ներքին խաղաղութեան միտող գերագոյն յանձնաժողով մը կազմելու մասին: «Չենք արտօներ, որ արտերկրեայ ուժեր Սուրիան մղեն քաոսի կամ քաղաքացիական պատերազմի», վստահեցուց Շարաա:
