Վարչապետ Նաուաֆ Սալամ համոզում յայտնեց, որ Լիբանան իսկական հնարաւորութիւն ունի փրկուելու ճգնաժամերէն, թէեւ անցնող տարիներուն կորսնցուցած է բազմաթիւ առիթներ: Սալամ ցաւ յայտնեց, որ Լիբանան չէ գործադրած Թայէֆի համաձայնութիւնը եւ լիբանանեան բանակը չէ տեղակայած հարաւի մէջ: «Այսօր ունինք նոր հնարաւորութիւն մը եւ կա՛մ կը յաջողինք, կա՛մ աւելի կը վատթարանայ կացութիւնը», ահազանգեց վարչապետը: Անոր համաձայն, պատերազմին աւերուած շրջանները վերականգնելու համար անհրաժեշտ է առնուազն 14 միլիառ տոլար: Սալամ նշեց, որ երեսփոխաններուն ու քաղաքացիներուն լաւատեսութեան եւ վստահութեան կառավարութիւնը պէտք է պատասխանէ աշխոյժ աշխատանքով եւ բարեկարգումներով:
