Փոխվարչապետ Թարէք Միթրի յստակացուց, որ Լիբանան տակաւին պատրաստ չէ խաղաղութիւն կնքելու Իսրայէլի հետ: Հեռուստային հարցազրոյցի մը մէջ, Միթրի Իսրայէլը ամբաստանեց լիբանանեան հողեր բռնագրաւելով կառավարութիւնը բանակցային հոլովոյթի մղելու մէջ, սակայն յստակացուց, որ ցարդ այս առումով ճնշում չկայ Լիբանանի ուղղութեամբ, այլ միայն անուղղակի փորձեր եւ Միացեալ Նահանգներու մէջ քաղաքական անուղղակի շարժումներ: «Իսրայէլեան կողմէն կայ 1701 բանաձեւի բացայայտ խախտում՝ սահմանամերձ շրջանին մէջ ապահովական մտավախութիւններու պատճառաբանութեամբ», ըսաւ փոխվարչապետը եւ հաւաստիացուց, որ լիբանանեան բանակը կը կատարէ իր պարտականութիւնները հարաւային շրջաններուն մէջ:
Ապահովական առումով, լիբանանեան բանակը երէկ յայտարարեց, թէ նախանցեալ օրը կապը կտրուած էր հարաւային Քֆարքիլա շրջանէն զինուորի մը հետ, իսկ երէկ ի յայտ եկած է, որ իսրայէլացիները սահմանին մօտ կրակ բացած են լիբանանցի զինուորին վրայ, մինչ ան սահմանային Քֆարշուպայի մօտ էր քաղաքացիական զգեստով: Ըստ բանակի հաղորդագրութեան, իսրայէլացիները կրակ բացած են զինուորին վրայ, զայն վիրաւորած եւ այդ վիճակի մէջ առեւանգելով իրենց հետ տարած: Առողջապահութեան նախարարութիւնը մինչ այդ յայտարարեց, թէ զինուոր մը զոհուած է եւ երկու մարդ վիրաւորուած՝ Քֆարքիլայի մէջ տեղի ունեցած ոտնձգութիւններուն պատճառով:
