Այսուհետեւ աւելի պիտի դժուարանայ Պաքուի մէջ գերեվարուած հայերուն մասին տեղեկութիւններ ստանալու աշխատանքը: Շարունակելով իր անմարդկային վարքագիծը, Ատրպէյճանի կառավարութիւնը երկու օր առաջ Կարմիր խաչի միջազգային կազմակերպութիւնը վտարեց երկրի տարածքէն՝ Արցախի գերեվարուած պետական նախկին նախարար Ռուբէն Վարդանեանի ծանօթ ուղերձի հրապարակումէն ընդամէնը քանի մը օր ետք: Կազմակերպութեան բանբերը յայտնեց, որ այժմ կը բանակցին Պաքուի իշխանութիւններուն հետ: Նշենք, թէ Կարմիր խաչը Պաքուի մէջ գերեվարուած հայերուն միակ պատուհանն էր արտաքին աշխարհ: Քանի մը ամիսը անգամ մը, Կարմիր խաչի ներկայացուցիչները կ’այցելէին գերիներուն՝ ծանօթանալու անոնց բանտային պայմաններուն եւ ստուգելու առողջութիւնը, նաեւ հաղորդակցութեան կապ հաստատելու անոնց ընտանիքներուն հետ: Այժմ վտանգուած է այդ մարդասիրական հոլովոյթը:
