Իսրայէլեան ուժերու շարունակական գործողութիւններէն ետք, կարգը հասած է նաեւ քաղաքացիներուն՝ ներթափանցելու լիբանանեան սահմանային շրջաններու մէջ: Լիբանանեան բանակը յայտարարեց, թէ զինադադարի համաձայնութեան բացայայտ խախտումով մը, իսրայէլացի քաղաքացիներ զինուորներու ընկերակցութեամբ մուտք գործած են Հուլայի շրջան՝ կրօնական ենթադրեալ սրբավայր մը այցելելու պատրուակով: «Բանակի հրամանատարութիւնը կը հետեւի իսրայէլեան խախտումներուն եւ ստեղծուած իրավիճակը կը քննարկէ ԵՈՒՆԻՖԻԼ-ի խաղաղապահ ուժերուն հետ», նշուեցաւ յայտարարութեան մէջ:
