Մարդկային իրաւունքներու սուրիական դիտարանը յայտարարեց, թէ առնուազն 70 մարդ մահացած է Լաթաքիոյ գաւառին մէջ՝ նոր իշխանութեան ապահովական ուժերուն եւ նախկին վարչակարգին հպատակող զինեալներու միջեւ բռնկած ծանր բախումներուն հետեւանքով: Մարտերուն լոյսին տակ, պաշտպանութեան եւ ներքին գործերու նախարարութիւնները զինուորական եւ ապահովական յաւելեալ ուժեր առաքած են Լաթաքիա եւ Թարթուս՝ հակակշիռի տակ առնելու կացութիւնը: Նշենք, թէ որոշակի լարուածութիւն տիրած է նաեւ երկրի հարաւային հատուածին մէջ, ուր տիւրզիներուն մէկ մասը կը զօրակցի նոր իշխանութեան, իսկ միւսը՝ կ’ընդդիմանայ Ահմատ Շարաայի քաղաքականութիւններուն: Իսրայէլ, իր կարգին, ներթափանցումներով աւելի կը սրէ կացութիւնը:
Սէուտական Արաբիոյ Արտաքին գործերու նախարարութիւնը հաղորդագրութեամբ մը ամբողջական զօրակցութիւն յայտնեց Դամասկոսի իշխանութիւններուն՝ օրինախախտ խմբաւորումներուն դէմ իրենց պայքարին մէջ: Ռիատ դատապարտեց ապահովական ուժերուն դէմ յարձակումները եւ կոչ ուղղեց վերականգնելու երկրին կայունութիւնն ու անվտանգութիւնը:
