Հայաստանի վարչապետ Նիկոլ Փաշինեան յայտնեց, որ Պաքուի մէջ Արցախի գերեվարուած ղեկավարութեան դատավարութեան ընթացքին կը գործածուին արգիլուած միջոցներ եւ կը կատարուին խոշտանգումներ: Խորհրդարանէն իր արտասանած խօսքին մէջ Փաշինեան հաստատեց, որ Արտաքին գործերու նախարարութիւնը տուած է յստակ գնահատական ու Երեւան պիտի շարունակէ աշխատանք տանիլ՝ խնդիրի լուծումին ուղղութեամբ: «Մեր գնահատականը շատ յստակ է այս հարցով. ատրպէյճանցիները կը գործադրեն ֆիզիքական եւ հոգեբանական ճնշումի միջոցներ: Այս մեզի համար անընդունելի է», յստակացուց Փաշինեան:
Նոյն հարցին անդրադարձաւ նաեւ «Ազնաւուր» հիմնադրամի համահիմնադիր եւ Հոգաբարձուներու խորհուրդի նախագահ Նիքոլա Ազնաւուր: Ան խօսեցաւ Պաքուի բանտին մէջ հացադուլ յայտարարած Արցախի պետական նախկին նախարար Ռուբէն Վարդանեանի դիմագրաւած վտանգաւոր կացութեան մասին եւ ըսաւ. «Հիմա մեր կարգն է սատար կանգնելու Ռուբէնին: Պէտք է անոր յորդորենք դադրեցնել հացադուլը եւ մեզի հնարաւորութիւն տալ, որ օգնենք իրեն: Պէտք է մեր ձայնը բարձրացնենք, իրազեկող քայլերու դիմենք, գործողութիւններ պահանջենք: Անոր անձնազոհ նուիրումը պէտք չէ ըլլայ առողջութեան կամ կեանքի գնով», ըսաւ Ազնաւուր:
