Շարք մը երկիրներու դէպի Միացեալ Նահանգներ արտահանումներուն նկատմամբ վճարները եւ մաքսային տուքերը բազմապատկելու նախագահ Տոնըլտ Թրամփի որոշումը կը շարունակէ ներգրաւել սուր քննադատութիւն: Գանատայի վարչապետ Ճասթին Թրուտօ յայտնեց, որ իր երկրի արտահանումներուն նկատմամբ նոր տուրքեր սահմանելու որոշումով նախագահ Տոնըլտ Թրամփ կը միտի այնքան թուլացնել Գանատան, որ կարելի ըլլայ զայն բռնակցել Միացեալ Նահանգներուն:
Իսկ Ուաշինկթընի մէջ Չինաստանի դեսպանութիւնը յայտարարեց, որ եթէ Միացեալ Նահանգներուն ուզածը վճարներու եւ առեւտուրի պատերազմ է, ապա Փեքին պատրաստ է անոր: Նշենք, որ Չինաստանէն ներածումներուն նկատմամբ սահմանուած մաքսային տուրքը 10-էն 20 առ հարիւրի բարձրացնելու Թրամփի որոշումէն օրեր ետք Փեքինի իշխանութիւնները, իրենց կարգին, յաւելեալ տուրքեր սահմանեցին ամերիկեան արտադրանքին նկատմամբ:
