Իսրայէլի վարչապետ Պենիամին Նեթանիահու յայտնեց, թէ իսրայէլեան ուժերը հասած են սահմանային Շէյխ լեռան գագաթը եւ փոխած են Միջին Արեւելքի դիմագիծը: «Շատ չեն բանակները, որոնք միաժամանակ հնարաւորութիւն ունին կռուելու զանազան ճակատներու վրայ», ըսաւ Նեթանիահու, աւելցնելով որ արագացուցած են զէնքի տեղական արտադրութիւնը՝ կրճատելու համար վստահութիւնը արտերկրի վրայ:
Իսրայէլեան ուժերը կը շարունակեն ներթափանցումները Սուրիոյ հարաւային շրջանին մէջ: Սուրիական հեռատեսիլի պաշտօնական կայանը երէկ հաղորդեց, որ իսրայէլեան ուժերը մուտք գործած են Քնէյթրա գաւառի Սուէյսէ գիւղը: Սուրիոյ նախկին վարչակարգի տապալումէն ետք, իսրայէլեան բանակը ապահով գօտի մը հաստատած է սահմանի սուրիական հատուածին մէջ, մուտք գործելով հարաւային երեք գաւառները՝ Քնէյթրա, Տարաա եւ Սուէյտէ:
