Լիբանանեան սահմանային որոշ բարձունքներու վրայ տակաւին դիրքաւորուած եւ այդպիսով պայմանաւորուածութիւնները ոտնակոխող իսրայէլեան բանակը կը շարունակէ իր զինուորական գործողութիւնները հարաւի ամբողջ տարածքին՝ Հըզպալլայի վերազինումն ու հարաւ վերադարձը արգիլելու պատճառաբանութեամբ: Իսրայէլեան անօդաչու սարքեր երէկ ինքնաշարժ մը թիրախաւորեցին Նաքուրայի ճամբուն վրայ՝ վիրաւորելով երկու եղբայր, ապա վերադառնալով երկրորդ հարուած ուղղեցին նոյն շրջանին՝ հաւաքուած քաղաքացիները հեռացնելու նպատակով: Ըստ իսրայէլացի բանբերին, կործանուած ինքնաշարժը զէնք կը փոխադրէր Հըզպալլային:
«Բարգաւաճում եւ ազատագրութիւն» խմբակցութեան անդամ, երեսփոխան Ալի Հասան Խալիլ անընդունելի համարեց լիբանանեան հողի վրայ իսրայէլեան ներկայութիւնը, զայն համարելով բռնագրաւում: Անոր խօսքով, Լիբանանի գերիշխանութիւնը կարելի չէ տարանջատել արժանապատուութենէն, ուստի լիբանանեան հողի պաշտպանութիւնը կը մնայ ազգային պարտականութիւն: Իսկ Amnesty International իրաւապաշտպան կազմակերպութիւնը կոչ ուղղեց միջազգային հետաքննութիւն բանալու Լիբանանի դէմ պատերազմին ընթացքին առողջապահական խումբերուն, ինքնաշարժներուն եւ կեդրոններուն նկատմամբ կատարուած յարձակումներուն նկատմամբ, զանոնք համարելով պատերազմական ոճիրի օրինակներ:
