Հպարտագին հրճուանքով տեղեկացանք, որ Կիրակի, 2 Մարտին, Մեծի Տանն Կիլիկիոյ Կաթողիկոսութեան Մայրավանքին մէջ աբեղայ ձեռնադրուած է թերթիս նուիրեալներէն եւ Ս.Դ.Հ.Կ.-ի Լիբանանի շրջանի Վարիչ մարմինի նախկին անդամներէն ընկեր Թադէոս Ճուլֆայեանի որդին:
Ն.Ս.Օ.Տ.Տ. Արամ Ա. Վեհափառ Կաթողիկոսի նախագահութեամբ տեղի ունեցած աբեղայական ձեռնադրութեան եւ օծման արարողութիւնը կատարած է Բերիոյ Հայոց Թեմի առաջնորդ Գերշ. Տ. Մակար Արք. Աշգարեան, խարտաւիլակութեամբ Սուրբ Աստուածածին Վանքի վանահօր՝ գերպ. Տ. Շնորհք ծ. վրդ. Աշըգեանի։
Բուն Բարեկենդանի տօնին զուգադիպող այս նշանակալից խորհուրդի ընթացքին երկու սարկաւագներ՝ Կարէն Եօսուլքանեան եւ Յակոբ Ճուլֆայեան միացած են Կիլիկեան ուխտեալ Միաբանութեան շարքերուն:
Առաջինը վերանուանուած է Տէր Մովսէս քահանայ, իսկ Յակոբը՝ Տէր Աբրահամ քահանայ:
Յայտնենք, որ Տ. Աբրահամ քահանային կնքահայրութիւնը ստանձնած էին Յովիկ եւ Մեղրի Արսլանեան ամոլը:
Այս ցնծալից ձեռնադրութեան առիթով, «Արարատ» ջերմօրէն կը շնորհաւորէ օծեալ աբեղան, տէր եւ տիկին ընկ. Թադէոս եւ Շաղիկ Ճուլֆայեանները եւ համայն հարազատները:
