Հանրապետութեան նախագահ Ժոզէֆ Աուն երէկ ժամանեց Ռիատ, ուր սէուտցի բարձրաստիճան պաշտօնատարներուն հետ կը քննարկէ տարածաշրջանային հարցերը, երկկողմանի յարաբերութիւնները եւ Լիբանանին աջակցելու միջոցները: Աուն յայտնեց, թէ այս այցելութիւնը կը վերահաստատէ Պէյրութի եւ Ռիատի միջեւ յարաբերութիւններուն խորութիւնը եւ լաւ հնարաւորութիւն է գնահատելու սէուտական շարունակական զօրակցութիւնը Լիբանանին, անոր կայունութեան, խաղաղութեան եւ պետական սահմանադրական հաստատութիւններու հեզասահ աշխատանքի երաշխաւորումին: Հանրապետութեան նախագահին ընկերակցող պատուիրակութեան մաս կազմեց արտաքին գործերու նախարար Եուսէֆ Ռաժժին եւ Ռիատի մէջ Լիբանանի դեսպանը:
