Ուքրանիոյ նախագահ Վոլոտիմիր Զելենսքի հասաւ Միացեալ Նահանգներ եւ Սպիտակ տան մէջ տեսակցեցաւ իր ամերիկացի պաշտօնակից Տոնըլտ Թրամփի հետ՝ քննարկելու Ուքրանիոյ պատերազմը, երկկողմանի համագործակցութիւնը եւ ուքրանացիներուն տրամադրուած աջակցութիւնը՝ շարունակելու համար պայքարը ռուսական ուժերուն դէմ: Խորհրդակցութենէն ետք Թրամփ յայտնեց, թէ իր ուքրանացի պաշտօնակիցը պատրաստ չէ Ռուսիոյ հետ խաղաղութեան: «Զելենսքի չյարգեց Միացեալ Նահանգները եւ կը խորհի, որ մեր աջակցութեամբ կրնայ ունենալ բանակցային առաւելութիւններ: Անոր զինուորներուն թիւը կը կրճատուի, սակայն ան տակաւին կը մերժէ զինադադարը: Ան կրնայ վերստին Սպիտակ տուն վերադառնալ երբ պատրաստ ըլլայ խաղաղութեան», շեշտեց Թրամփ: Անոր համաձայն, Ուաշինկթըն պարզապէս կ’ուզէ խաղաղութեան յանգիլ, ոչ թէ աջակցիլ Զելենսքիին:
Այլ գիծի վրայ, ամերիկացի նախագահը յայտնեց, թէ Գանատայի եւ Մեքսիքայի նկատմամբ մաքսային տուրքերու սահմանումը պիտի սկսի Մարտին, իսկ Չինաստանի արտադրութիւններուն նկատմամբ պիտի սահմանուի յաւելեալ 10 առ հարիւրի տուրք:
