Թուրքիոյ մէջ բանտարկուած՝ Քիւրտիստանի աշխատաւորական կուսակցութեան առաջնորդ Ապտիւլլա Օճալան նախանցեալ օր կուսակցութեան ղեկավարութեան առաջարկեց վերջ տալ զինեալ պայքարին եւ վար դնել զէնքերը: Անոր համաձայն, կուսակցութիւնը հիմնուած էր փոթորկոտ ժամանակաշրջանի մէջ, երբ քրտական հարցը անտեսումի ենթակայ էր, իսկ այսօր անհրաժեշտ է յանգիլ խաղաղութեան:
Իրաքի Քիւրտիստան գաւառի ղեկավարութիւնը ողջունեց Օճալանի յայտարարութիւնները, Քիւրտիստանի աշխատաւորական կուսակցութեան կոչ ուղղելով գործադրելու բանտարկուած ղեկավարին կոչը: Իսկ Սուրիոյ մէջ կռուող քրտական Ժողովրդավարական սուրիական ուժեր կազմակերպութեան ղեկավար Մազլում Ապտի յայտնեց, թէ Օճալանի կոչը կը վերաբերի բացառաբար իր կուսակութեան եւ որեւէ կապ չունի Սուրիոյ մէջ աշխուժացող քրտական կազմակերպութիւններուն հետ:
