Արտաքին գործերու նախարար Եուսէֆ Ռաժժի յայտնեց, թէ որեւէ կողմ տակաւին Լիբանանի հետ չէ արծարծած Իսրայէլի հետ խաղաղութիւն կնքելու թղթածրարը: Ըստ նախարարին, այս հարցը զգայուն է, ուստի եթէ արծարծուի, ապա այդ պիտի ըլլայ կառավարութեան միջոցաւ, ոչ թէ նախարարութեան կողմէ: Խօսելով Սուրիոյ հետ յարաբերութիւններուն մաին, Ռաժժի հաւաստիացուց, որ Պէյրութ կ’ուզէ Դամասկոսի հետ ունենալ փոխադարձ յարգանքի վրայ հիմնուած յարաբերութիւններ: «Մենք սկսանք քննարկել լիբանանեւսուրիական գերագոյն խորհուրդը չեղարկելու հաւանականութիւնը», ըսաւ նախարարը՝ աւելցնելով, որ կը ծրագրի շուտով այցելել Դամասկոս:
Ռուսիոյ նախագահ Վլատիմիր Փութին իր կարգին յայտնեց, որ Ուաշինկթընի մէջ իշխող վարչակազմը այժմ իրապաշտ է եւ պատրաստակամութիւն ունի հրաժարելու անցեալի գաղափարներէն:
