Ելեւմուտքի նախարար Եասին Ժապէր ընդունեց Միջազգային դրամատան փոխնախագահ Օսման Տիունը, ընկերակցութեամբ դրամատան տարածաշրջանային տնօրէնին: Ժողովականները քննարկեցին Լիբանանի ելեւմտական կացութիւնը եւ կառավարական ծրագրերուն աջակցելու հնարաւորութիւնները: Ժապէր յայտնեց, որ Միջազգային դրամատունը կը քննարկէ Լիբանանի մէջ ծրագրուած վերակառուցումներուն համար յատկացնել մէկ միլիառ տոլարի հիմնադրամ մը:
Իսկ Միացեալ Նահանգներու Արտաքին գործերու նախարարութիւնը յայտարարեց, թէ Ուաշինկթըն պիտի համագործակցի Լիբանանի նորակազմ կառավարութեան հետ՝ տնտեսական անհրաժեշտ բարեկարգումներ գործադրելու ուղղութեամբ: Կառավարութեան վտահութեան քուէի տիրացումին առթիւ շնորհաւորելով լիբանանցիները, Ուաշինկթըն մաղթեց, որ նախագահ Ժոզէֆ Աուն եւ վարչապետ Նաուաֆ Սալամ կը յաջողին երկիրը առաջնորդել բարգաւաճումի եւ հաստատութիւններու վերականգնումի ուղղութեամբ:
