Գերիշխանութիւն կը նշանակէ խաղաղութեան եւ պատերազմի որոշումը վերապահել կառավարութեան մօտ, իսկ պետական հաստատութիւնները կ’ունենան զէնք կրելու եւ գործածելու մենաշնորհ: Այս մասին յայտնեց հանրապետութեան նախագահ Ժոզէֆ Աուն, աւելցնելով որ իր ղեկավարած կառավարութեան նպատակն է վերակառուցել պետութիւնը: «Աշխատանք կը տանինք բոլոր պետութիւններուն հետ ունենալու փոխադարձ յարգանքի եւ համագործակցութեան վրայ հիմնուած յարաբերութիւններ: Իրան պէտք է բարեկամական կապեր ունենայ ոչ միայն որոշ խմբաւորումներու, այլեւ բոլոր լիբանանցիներուն հետ», ըսաւ Աուն: Ան կարեւոր համարեց Միացեալ Նահանգներու հետ սերտ համագործակցութեան մշակումը, հաւաստիացնելով թէ բանակին տրամադրուող օգնութիւններու ամերիկեան ծրագիրը տակաւին կը գործադրուի: Նախագահը կարեւորեց բանակին տեղակայումը Լիբանանի ամբողջ տարածքին: Ան ընդգծեց, որ նոր Լիբանանը կառուցելու համար պիտի հիմնուի Սահմանադրութեան եւ իր եդմնակալութեան ուղերձին վրայ: Ան շնորհաւորեց կառավարութիւնը՝ խորհրդարանի վստահութեան քուէն ստանալուն առթիւ, կարեւորելով երկխօսութեան սկզբունքը որդեգրելու որոշումը:
Անդրադառնալով Լիբանան ապաստանած սուրիացիներու թղթածրարին, Աուն շեշտեց, որ Սուրիոյ իշխանութիւնները չեն կրնար հրաժարիլ երկու միլիոն քաղաքացիներէ եւ անհրաժեշտ է աշխատանք տանիլ՝ զանոնք տուն վերադարձնելու ուղղութեամբ: «Սէուտական Արաբիա կատարելիք այցելութեանս ընթացքին պիտի փորձենք վերակենդանացնել լիբանանեան բանակին տրամադրուած օգնութիւններու ծրագիրը», ըսաւ նախագահը եւ բացառիկ որակեց խորհրդարանի նախագահ Նեպիհ Պըրրիի հետ իր յարաբերութիւնը: Նախագահ Աուն ընդունեց կրթական սեփական հաստատութիւններու համադաշնակցութիւնը ներկայացնող պատուիրակութիւն մը, որուն հետ արծարծեց կրթական ոլորտին առջեւ ցցուած խնդիրները: Աուն կառավարութեան համար առաջնահերթութիւն համարեց այս ոլորտը, խոստանալով աշխատանք տանիլ՝ մարտահրաւէրները յաղթահարելու եւ կրթական ոլորտով զբաղող կառոյցներուն կողքին կանգնելու համար:
