Համաս շարժումը յայտարարեց, թէ պաղեստինցի գերիներու 7-րդ խմբակին ազատ արձակումը պիտի կատարուի իսրայէլացի մահացած գերիներու մարմիններու յանձնումին զուգահեռ, խոստանալով փոխանակումին թուականը յայտարարել յարմար պահուն: Ըստ Համասի, նոր ծրագիրը պիտի երաշխաւորէ Իսրայէլի կողմէ համաձայնութեան ամբողջական գործադրութիւնը: Նշենք, որ իսրայէլեան իշխանութիւնները անցեալ Շաբաթ օր մերժած էին արձակել գերիներուն 7-րդ խումբը եւ Համասը ամբաստանած էին համաձայնութեան գործադրութիւնը խախտելու մէջ:
Ռուսիոյ արտաքին գործերու նախարար Սերկէյ Լաւրով յայտնեց, որ Քաթարի Թամիմ պըն Համատ իշխանին հետ քննարկած է պաղեստինեան եւ լիբանանեան հողերուն զարգացումները, քննադատելով իսրայէլեան բանակին որոշ գործողութիւնները Լիբանանի եւ Կազայի դէմ: Այլ գիծի վրայ, Լաւրով պատրաստակամութիւն յայտնեց Սթամպուլի մէջ գումարելու ամերիկացի եւ ռուս դիւանագէտներու հերթական բանակցային տեսակցութիւնը, շարունակելու համար Ռիատի մէջ 18 Փետրուարին սկսած քննարկումները:
