Իսրայէլեան ուժերը շարունակեցին լիբանանեան զանազան շրջաններու ռմբակոծումները: Առողջապահութեան նախարարութիւնը երէկ յայտարարեց, թէ անօդաչու սարքի մը հարուածէն Հըրմէլ-Քասր ճամբուն վրայ սպաննուած է լիբանանցի մը: Իսկ իսրայէլեան բանակը յայտարարեց, թէ ռազմական օդանաւեր Սուրիոյ հետ Լիբանանի սահմանին վրայ թիրախաւորած են Հըզպալլայի զինամատակարարումի գլխաւոր պատասխանատուներէն մէկը, որ կը ծրագրէր յաւելեալ զէնք փոխանցել Հըզպալլային: Երէկ մահացաւ նաեւ քանի մը օր առաջ Նապաթիէ գաւառի Ժարժուհ շրջանին մէջ անօդաչու սարքի մը հարուածէն ծանրօրէն վիրաւորուած կին մը:
Քաղաքացիական անվտանգութեան ծառայութիւնը յայտարարեց, թէ շարունակած է զոհերու մարմիններուն որոնումները հարաւային շրջաններուն մէջ, ուրկէ վերջերս քաշուած են իսրայէլեան ուժերը: Տէյր Միմէս շրջանին մէջ կատարուած որոնումներուն ընթացքին կարելի եղած է յայտնաբերել հինգ մարդու դի: Իսկ հարաւի սահմանային Տուհէյրա գիւղին մէջ քաղաքացիներ կազմակերպեցին բողոքի հաւաք մը, պահանջելով իսրայէլեան ուժերը հեռացնել հիւղին հարաւային թաղամասէն:
Միւս կողմէ, իսրայէլեան բանակի հիւսիսային շրջանի հրամանատարութիւնը յայտարարեց, թէ շրջանին մէջ տիրող ապահովական իրավիճակը քաղաքացիներուն կը թոյլատրէ վերադառնալ իրենց սահմանային հատուածի բնակարանները:
