Օմանի արտաքին գործերու նախարար Պատըր Պըն Համատ պըն Համուտ Պուսայիտի այցելեց Պէյրութ ու տեսակցեցաւ հանրապետութեան նախագահ Ժոզէֆ Աունի հետ: Զրուցակիցները քննարկեցին լիբանանեան եւ շրջանային զարգացումները, ինչպէս նաեւ երկկողմանի համագործակցութեան խորացումը: Աուն մաղթեց, որ Գահիրէի մէջ գումարուելիք Արաբական լիկայի արտակարգ գագաթաժողովին ընթացքին կարելի ըլլայ միասնական դիրքորոշում առնել արաբական աշխարհին դիմաց ցցուած մարտահրաւէրներուն առնչութեամբ: Օմանէն ժամանած պատուիրակութիւնը տեսակցեցաւ նաեւ խորհրդարանի նախագահ Նեպիհ Պըրրիի հետ: Հիւր նախարարը յայտնեց, որ հանդիպումը եղած է արդիւնաւէտ եւ անոր ընթացքին քննարկուած են երկկողմանի յարաբերութիւնները աւելի եւս խորացնելու միջոցները:
