Վարչապետ Նաուաֆ Սալամի կառավարութիւնը այսօր իսկ կը սկսի մշակել աշխատանքային ծրագիրը գործադրելու ծրագրեր եւ աշխատանք տանիլ այդ իրականացնելու ուղղութեամբ: Խորհրդարանին մէջ երէկ գիշեր վերջ գտան կառավարութեան վստահութեան քուէ շնորհելու նիստերը եւ նախարարաց խորհուրդը ստացաւ լիբանանցիներու ներկայացուցիչներէն 95-ին վստահութիւնը, մինչ 12 երեսփոխան դէմ քուէարկեցին եւ չորս ուրիշներ մնացին ձեռնպահ: Ըստ խորհրդարանական տեղեկութիւններու, կառավարութեան քուէ չեն տուած Ազգային ազատ հոսանքի «Ուժեղ Լիբանանը» համախմբումի երեսփոխաններն ու Սինթիա Զարազիրը, մինչ ձեռնպահ մնացած են Նապիլ Պատրը, Մոհամմատ Հութը, Ժամիլ Սայէտը եւ Հայտար Նասէրը:
Երկու օրերու ընթացքին գումարուած ժողովներուն ընթացքին խօսեցան 48 երեսփոխաններ, որոնց մեծամասնութիւնը աջակցութիւն յայտնեց Սալամի աշխատանքային ծրագրին եւ նոր մօտեցումներուն, մինչ կարգ մը երեսփոխաններ քննադատեցին կառավարութիւնը կազմելու մեթոտաբանութիւնը: Իսկ Ազգային ազատ հոսանքի երեսփոխանները նիստէն քաշուեցան՝ դժգոհելով խորհրդարանի նախագահին որոշումէն եւ բաւարարուեցան միայն համախմբումի նախագահ, երեսփոխան Ժըպրան Պասիլի խօսքով:
Վստահութիւն շնորհելու նիստերու աւարտին, վարչապետ Նաուաֆ Սալամ յայտնց, որ իրենք պիտի շարունակեն աշխատանք տանիլ միջազգային ուժերու հետ եւ ճնշում բանեցնել Իսրայէլի վրայ, որպէսզի դադրեցնէ Լիբանանի գերիշխանութեան իր խախտումները եւ վերջ տայ լիբանանեան հողի բռնագրաւումին: Խօսելով կառավարութեան ծրագրերուն մասին, Սալամ խոստացաւ յառաջիկայ շաբաթներուն կազմել ելեկտրականութեան ոլորտը տնօրինող խորհուրդ մը եւ վերջ տալ ելեկտրականութեան հոսանքի գողութեան: Ան վերահաստատեց, որ կառավարութիւնը շուտով պիտի ամբողջացնէ պետական թափուր պաշտօններուն նշանակումները՝ մասնագիտական փորձ ունեցող անձնաւորութիւններով:
