ՄԱԿ-ի մէջ Միացեալ Նահանգներու մնայուն դեսպան Տորոթի Շիա Ռուսիոյ եւ Ուքրանիոյ իշխանութիւններուն կոչ ուղղեց զօրակցելու պատերազմին վերջ դնելու առնչութեամբ Ուաշինկթընի առաջադրած բանաձեւին, մինչ ՄԱԿ-ի Ընդհանուր խորհուրդը կը պատրաստուի քննարկելու Ուքրանիոյ պատերազմի երրորդ ամեակին առիթով ներկայացուած այդ նախագիծին մանրամասնութիւնները՝ քուէարկութիւն կազմակերպելու նպատակով: Շիայի համաձայն, ամերիկեան առաջարկը կը ներառէ պատերազմը անյապաղ դադրեցնելու եւ ռուս-ուքրանական մնայուն խաղաղութեան յանգելու կոչ: Ռուսիոյ արտաքին գործերու նախարար Սերկէյ Լաւրով միւս կողմէ յայտնեց, թէ իրենք պատրաստ են բանակցելու Ուքրանիոյ ու Եւրոմիութեան հետ, սակայն պիտի չդադրեցնեն յարձակումները, բացի եթէ բանակցութեանց արդիւնքները գոհացուցիչ ըլլան Ռուսիոյ համար: Գետնի վրայ, Եւրոմիութեան անդամ շարք մը երկիրներու ղեկավարներ երէկ ժամանեցին Քիեւ՝ աջակցելու համար Ուքրանիոյ իշխանութիւններուն: Անոնց այցելութեան ընթացքին հնչեց օդային յարձակումներէ զգուշացնող ահազանգ: Օր մը առաջ, Եւրոմիութիւնը երկարաձգած էր Մոսկուայի նկատմամբ սահմանած պատժամիջոցները, պահանջելով անյապաղ դադրեցնել պատերազմը:
