Ինչպէս կը նախատեսուէր, Լիբանանի գրեթէ բոլոր շրջաններէն այս տարի բացակայած ձմեռը վերջապէս հասաւ Փետրուարի աւարտին՝ եղանակի եզրափակիչ փուլի սեմին եւ ընդամէնը մէկ օրուայ ընթացքին սպիտակով ծածկեց ոչ միայն լեռնային գօտին, այլեւ նոյնիսկ ծովեզերքին մերձակայ բլուրներն ու բնակավայրերը, ուր քաղաքացիներուն առաւօտը դիմաւորուեցաւ ձիւնաթափով, սակայն շատերու աշխատանքը խափանուեցաւ՝ եղանակի եւ ճամբաներու անյարմարութեան պատճառով: Բազմաթիւ վարժարաններ երէկ փակ պահեցին իրենց դռները, մինչ շատ հաստատութիւններ սահմանափակեցին աշխատանքային ժամերը եւ քաղաքացիները կանուխ փութացին տուն: Ներքին ապահովութեան ուժերը երէկ առաւօտեան կանուխ ու երեկոյեան ուշ ժամերուն փակեցին լեռնանցքերը՝ ներառեալ Թարշիշի ճամբան եւ Տահր Պայտարը, կանխելու համար երթեւեկային արկածները, որոնք յաճախ պատահած էն անցնող օրերուն՝ ճամբաներուն վրայ կազմուած սառոյցի շերտերուն պատճառով: Իսկ Հանրօգուտ աշխատանքներու նախարարութեան եւ քաղաքապետութիւններուն մեքենաները անդադար աշխատեցան ձիւնէն մաքրել գիւղերու ճամբաները:
