Վարչապետ Նաուաֆ Սալամ եւս ընդունեց Իրանի խորհրդարանի նախագահը եւ հաւաստիացուց, որ Պէյրութ հնարաւոր բոլոր միջոցներով ճնշում կը բանեցնէ Իսրայէլի վրայ, որպէսզի ամբողջանայ լիբանանեան բռնագրաւեալ շրջաններէն անոր բանակին նահանջը: Խօսելով Պէյրութի միջազգային օդակայանէն իրանեան օդանաւերը հեռու պահելու որոշումին մասին, Սալամ դիտել տուաւ, որ օդակայանին եւ ուղեւորներուն անվտանգութիւնը առաջնահերթ է կառավարութեան համար, ու այդ հիման վրայ կը կայացուին թռիչքներուն վերաբերող որոշումները: Անդրադառնալով Կազայի թղթածրարին, Սալամ շեշտեց, որ հակամարտութեան լուծումը կը կայանայ պաղեստինցիներու ազատ ինքնորոշումի իրաւունքին մէջ, հիմնուելով պաղեստինեան պետութիւն մը հաստատելու մասին Արաբական լիկայի՝ Պէյրութի 2002 թուականի գագաթաժողովի որոշումներուն գործադրութեան վրայ: Ղալիպաֆ իր պատուիրակութեամբ այցելեց նաեւ Այն Թինէ, ուր խորհրդարանի նախագահ Նեպիհ Պըրրիին հետ տեսակցութեան ընթացքին վստահեցուց, որ Թեհրան պիտի կանգնի լիբանանցի ժողովուրդին, կառավարութեան եւ դիմադրութեան միասնականութեամբ առնուած որեւէ որոշումի կողքին:
