Հանրապետութեան նախագահ Ժոզէֆ Աուն խոստացաւ աշխատանք տանիլ գործադրելու երդմնակալութեան ուղերձին մէջ ներառած գաղափարները, որոնք կ’արտացոլեն քաղաքացիներուն տառապանքը եւ արժանապատիւ կեանք ապրելու ձգտումները: Աուն կոչ ուղղեց ամուր պահելու հաւատքը եւ չկորսնցնելու յոյսը, որովհետեւ միայն այդպէս կարելի է յաջողիլ: Պաապտայի պալատին մէջ մարոնի վանականներու պատուիրակութիւնը ընդունած ատեն Աուն հաւաստիացուց, որ այս պաշտօնին հասած է մարդոց ծառայելու նպատակով: Նախագահը ընդունեց նաեւ Իրանի խորհրդարանի նախագահ Մոհամմատ Պաղէր Ղալիպաֆի գլխաւորած պատուիրակութիւնը ու շեշտեց, թէ «Լիբանան մեծ գին վճարած է պաղեստինեան դատին համար ու կը զօրակցի երկու պետութիւններու լուծումին վերաբերող Ռիատի գագաթաժողովի յայտարարութեան»:
