Հայ քաղաքական կուսակցութիւններու ներկայացուցիչներու հերթական նիստը տեղի ունեցաւ Հինգշաբթի, 20 Փետրուար 2025-ին, «Շաղզոյեան» կեդրոնին մէջ։
Ժողովը նախ անդրադարձաւ հանրապետութեան նախագահի ընտրութեան, վարչապետի նշանակման ու կառավարութեան կազմութեան պայմաններուն եւ ողջունեց երկրի պետական հաստատութիւններու աշխատանքային բնականոն հուն վերադարձը։ Ժողովականները այս առիթով ընդգծեցին նաեւ երկրի գերիշխանութեան, տարածքային ամբողջականութեան ու միջհամայնքային համակեցութեան սկզբունքներու գերադաս համարումը եւ անոնց հիման վրայ պետութեան հետագայ աշխատանքին ընթացքին անհրաժեշտութիւնը։
Յատուկ օրակարգով հայ քաղաքական կուսակցութիւններուն ներկայացուցիչները որոշեցին միասնաբար նշել Հայոց ցեղասպանութեան 110-ամեակը՝ կեդրոնական եւ երիտասարդական ձեռնարկներով։ Այս առումով ծրագրումի համար նախատեսուած են խորհրդակցական հանդիպումներ։
ՍԴՀԿ-ի, ՀՅԴ-ի եւ ՌԱԿ-ի Լիբանանի պատասխանատու մարմիններու ներկայացուցիչները իրենց բողոքը արձանագրեցին Պաքուի մէջ ընթացող Արցախի ռազմաքաղաքական ղեկավարութեան դատավարական բեմադրութեան, կեղծ մեղադրանքներուն, մարդու իրաւունքներու խախտումներուն, դատավարութեան փակ բնոյթին եւ միջազգային օրէնքներ խախտող բոլոր երեւոյթներուն դէմ։ Անոնք միջազգային ընտանիքէն պահանջեցին նաեւ ճնշում բանեցնել միջազգային բոլոր օրէնքները խախտած եւ Արցախի ղեկավարութիւնը ապօրինաբար բանտարկած Ատրպէյճանի իշխանութիւններուն վրայ՝ ազատ արձակելու համար Պաքուի մէջ պահուող բոլոր հայ գերիները։
Նիստին վերջին բաժինով ժողովականները դատապարտեցին նաեւ Երուսաղէմի քաղաքային իշխանութիւնները, որոնք ոտնձգութիւններ կը կատարեն իրերայաջորդ արարներով, բռնագրաւելու համար Հայոց պատրիարքարանին պատկանող դարաւոր իրաւունքներն ու կալուածները։
