«Արարատ»ի խմբագրատունը անգամ մը եւս յաւելեալ փայլք ստացաւ անցեալ օր: Այս անգամ «մեղաւորը» Հ.Մ.Մ.-ի հաւատարիմ անդամներէն ընկեր Անդրանիկ Մելքոնեանն էր:
Ան զաւակն է թրքական եաթաղանէն ճողոպրած, Լիբանանի առաջին նաւաշինարար ողբացեալ Յակոբ Մելքոնեանի, որմէ՝ իր հանգուցեալ եղբօր Լեւոնին հետ արհեստանոցի կողքին ստացած է Հ.Մ.Մ.-ին անդաւաճան ծառայելու ժառանգութիւնը:
Նորահաս պատանիներն ու երիտասարդները, վստահաբար տեղեակ չեն նկարին աջ կողը երեւցող համեստ ընկերոջ կատարած միութենական արդիւնաբեր գործունէութեանց մասին: Նոյնի՛սկ՝ իր սերնդակիցներէն շատեր: Անաղմուկ եւ անխօս, քուլիսներու ետին, գործնապէս թեւ ու թիկունք է իր պաշտած Հ.Մ.Մ.-ին մարզական բոլոր բնագաւառներէն ներս՝ ֆութպոլ, պասքէթպոլ, մարմնամարզ, հեծանիւ եւ այլն: Հ.Մ.Մ.-ի համար ուրախացող եւ հիւանդացող «խենթերէն» էր ան եւ մինչեւ օրս ալ կը շարունակէ նոյն վարքագծով սատար հանդիսանալ, յատկապէս Հ.Մ.Մ.-եան երկրորդական պատանեկան խումբերուն:
Հ.Մ.Մ-«Վանիկ»ի՝ ողբացեալ Կարպիս Ռըզեանի երանելի տարիներուն անկորնչելի յիշատակները ճախրեցան խմբագրատանս մէջ: «Այս ալ պատմեմ, լսեցէք» ըսելով, յուշերը զիրար յաջորդեցին՝ թէ ինչպէս կամաւոր ընկերներու հետ ներկայ կ’ըլլար դռնփակ արգիլեալ մրցումներու, «Վանիկ»ի ֆութպոլիստներուն նիւթա-բարոյական դժուարութիւնները նաեւ ամոքելով: Հապա փորձի համար դաշտերուն տրամադրուելիք նիւթականի ապահովումը, Հ.Մ.Մ.-ի օթօքարին գնման պատմութիւնը: Հետաքրքրական էր «Լիվըրփուլ»ի կամ այլ միջազգային ֆութպոլային մրցումներուն իր ներկայութեան դրուագները Հ.Մ.Մ.-ի կարմիր-ճերմակ դրօշով:
«Արարատ» շնորհակալութիւններ յայտնեց յարգարժան վեթերանին կատարած խրախուսիչ այցելութեան համար: Նաեւ երկար կեանքի մաղթանք մը փոխանցեց անոր, նկատի առնելով, որ 2025-ին Հ.Մ.Մ.-ի ուխտեալ, համեստ զինուորը պիտի բոլորէ 80 տարիքը:
