ԱՐՑԱԽԵԱՆ ՇԱՐԺՈՒՄԻ 37-ԱՄԵԱԿ
37 տարի առաջ 20 Փետրուարին սկսաւ արցախեան շարժումը: Այս առթիւ, Արցախի քաղաքական վերնախաւը այցելեց Եռաբլուրի պանթէոն, ուր ներկայ եղան նաեւ Արցախի Ազգային ժողովի երեսփոխաններ: 1988-ի 20 Փետրուարին, Խորհրդային միութեան Լեռնային Ղարաբաղի Ինքնավար Մարզին (ԼՂԻՄ) Ազգային խորհուրդը հրապարակեց Հայաստանի հետ վերամիաւորումի որոշում: Այդպիսով սկիզբ առաւ Արցախի ազատագրական շարժումը, որ վեց տարուան ընթացքին արդիւնաւորուեցաւ յաղթանակներով եւ Արցախի ազատագրութեամբ: Արցախի թեմը յայտարարութիւն մը հրապարակեց Արցախեան շարժումի 37-ամեակին առթիւ, որուն մէջ տեղի ունեցածը համարեց ժողովրդական կամքի, տոկունութեան, պայքարի ոգիի եւ նուիրումի բացառիկ դրսեւորում: «Իրապէս հերոսական էր խորհրդային պետութեան մէջ իր ձայնը բարձրացուցած ժողովուրդը, որ ազգովին զինուորագրուեցաւ՝ յանուն ազատութեան, արդարութեան եւ Մայր հայրենիքին հետ վերամիաւորուելու երազանքի իրականացումին», նշուեցաւ յայտարարութեան մէջ: Արցախի թեմը ապա ցաւ յայտնեց, որ այսօր կը ճաշակենք հոգեւոր եւ ազգային անկում, պարտութեան, Արցախի կորուստին եւ ժողովուրդին բռնագաղթի դառնութիւնը: «Մեզի կը մնայ ապրիլ եւ գործել դէպի Արցախ հաւաքական վերադարձի հաւատքով եւ սպասումով: Մեր ժողովուրդը կը մնայ միասնական եւ տոկուն՝ անկախ արտաքին հանգամանքներէն», նշուեցաւ Արցախի թեմի յայտարարութեան մէջ:
