Լիբանանեան եւ շրջանային բոլոր հայեացքները վաղը կը կեդրոնանան Պէյրութի հարաւային արուարձաններուն վրայ, ուր տեղի պիտի ունենայ Հըզպալլայի ընդհանուր քարտուղարներ սեյիտ Հասան Նասրալլայի եւ սեյիտ Հաշէմ Սաֆիտտինի վերջին հրաժեշտը եւ յուղարկաւորութիւնը: Հըզպալլա այս առիթով արարողութիւն կազմակերպած է Պէյրութի Մարզական աւանի ֆութպոլի դաշտին մէջ, որմէ ետք Նասրալլայի մարմինը կ’ամփոփուի օդակայանի ճամբուն մերձակայ յատուկ հողատարածքի մէջ, իսկ Սաֆիտտինի մարմինը կը փոխադրուի իր ծննդավայրը: Հըզպալլահ այս առումով մշակած է կազմակերպչական եւ ապահովական հսկայական ծրագիր, մինչ պետական զինուորական ու ապահովական հաստատութիւնները եւս պիտի ստանձնեն իրավիճակը վերահսկելու իրենց պարտականութիւնը: Պաապտայի պալատին մէջ երէկ նախագահ Ժոզէֆ Աունի գլխաւորութեամբ գումարուեցաւ ապահովական համակարգումի ժողով, որուն ներկայ եղան պաշտպանութեան եւ ներքին գործերու նախարարները, զինուորական եւ ապահովական պաշտօնական հաստատութիւններուն ղեկավարները կամ անոնց ներկայացուցիչները: Լիբանանեան բանակը երէկ յայտարարեց զէնք կրելու եւ անօդաչու սարքերով նկարահանումներ կատարելու արտօնագրերուն սառեցումը:
