Հանրապետութեան նախագահ Ժոզէֆ Աուն Պաապտայի պալատ այցելած ամերիկեան գոնկրէսի պատուիրակութենէն պահանջեց, որ Ուաշինկթըն ճնշում բանեցնէ Իսրայէլի վրայ՝ Լիբանանի բռնագրաւեալ շրջաններէն իսրայէլեան ուժերու ամբողջական դուրսբերումը ապահովելու նպատակով: Աուն նաեւ շեշտեց լիբանանեան բանակին տրամադրուած ամերիկեան օգնութիւններու հոսքը շարունակելու կարեւորութիւնը, որպէսզի կարելի ըլլայ վերականգնել երկիրը:
Երէկ Պաապտայի պալատ այցելեցին Եւրոմիութեան ներկայացուցչութեան պատուիրակութիւնն ու Միջերկրականի շրջանի յանձնակատար Տուպրավքա Շուիցան: Վերջինս Եւրոմիութեան աջակցութիւնը յայտնեց Լիբանանին ու յիշեցուց, թէ անցնող չորս տարիներուն ընթացքին յատկացուած է 1,5 միլիառ եւրօ: Անոր համաձայն, յաւելեալ կէս միլիառ պիտի յատկացուի Լիբանանին՝ որոշ նախապայմաններու հիման վրայ: Նախագահ Աուն, իր կարգին, շեշտեց եւրոպական կողմին հետ համագործակցութիւնը եւ յանձնառութիւն յայտնեց արմատական բարեկարգումներու իրագործումին: Իսկ Փտածութեան դէմ պայքարի ազգային խորհուրդի պատուիրակութիւնը ընդունած ատեն Աուն զգուշացուց, թէ փտածութիւնը պիտի չդադրի եթէ չըլլայ հաշուետուութիւն, պահանջելով գործադրել բոլոր օրէնքները՝ պայքարելու խախտումներուն դէմ:
Նախագահ Աունն ու առաջին տիկինը երէկ հիւրընկալեցին Լիբանանի ֆութպոլի ֆետերասիոնի պատուիրակութիւնը եւ մինչեւ 17 տարեկան աղջիկներու Լիբանանի հաւաքականը, որ վերջերս Սէուտական Արաբիոյ մէջ տիրացած էր Արեւմտեան Ասիոյ ախոյեանութեան տիտղոսին: Նախագահը նշեց, որ այս իրագործումը վերստին կ’ապացուցէ, թէ Լիբանան կը մնայ յաջողութեան եւ նորարարութեան փարոս մը:
