Խոր ցաւով կը սգանք կրթական մշակ, դաստիարակ, հասարակական գործիչ, Արժանթինի վաստակաշատ հայուհի` փրոֆեսոր ԱՆԻ ՄՈՒՇԵԱՆ-ՍԱՐԳԻՍԵԱՆԻ մահը, որ տեղի ունեցաւ 17 Փետրուարին, Պուէնոս Այրէսի մէջ։
Ծագումով հաճընցի, ան կողակիցն էր «Արարատ»-ի, Հ.Մ.Մ.-ի, Ս.Դ.Հ.Կ.-ի գործօն անդամներէն, ինչպէս նաեւ Հարաւային Ամերիկայի «Շարժում» շաբաթաթերթի խմբագիր, փրոֆեսոր Սամօ Սարգիսեանի։
Ողբացեալը եղած է «Շարժում» հայկական մշակութային միութեան եւ Հարաւային Ամերիկայի Սոցիալ Դեմոկրատ Հնչակեան կուսակցութեան գործունեայ անդամ: Որպէս նորարար գաղափարներու տէր, գնահատուած էր իր շրջապատէն, ինչպէս նաեւ Ս.Դ.Հ.Կ.-ի Կեդրոնական ղեկավարութեան կողմէ:
Անիի մեկնումը կրթական մեծ բաց մը պիտի գոյացնէ Պուէնոս Այրէսի հայ համայնքին ընդհանրապէս եւ Ս. Գրիգոր Լուսաւորիչ մայր եկեղեցւոյ երկրորդական վարժարանին մէջ յատկապէս:
«Արարատ», նորոգ հանգուցեալին հրճուալից պահեր շնորհելու փոյթով, տիկին Ազատուհի Սիմոնեանի հետ համախորհուրդ, իր սիրեցեալ ամուինին՝ ողբացեալ Սամոյին կեանքի կարեւոր փուլերը իր էջերուն մէջ լոյս ընծայեց նախորդ՝ 18 Փետրուարի թիւով: Ափսո՜ս, որ երեք տարուան անարդարանալի յապաղումով հրատարակուած բաժինը տեսնելէ եւ հոգեկան գոհացում մը ստանալէ զրկուեցաւ ան, նոյն գիշերն իսկ պատահած իր անակնկալ մահով:
«Արարատ» խորապէս կը վշտակցի Անի Մուշեան-Սարգիսեանի ընտանիքին, հարազատներուն, ի մասնաւորի լիբանանահայ գաղութին ծանօթ Արամ եւ Լիտիա Մալեան եւ Ռաֆֆի եւ Թամար Մալեան ամոլներու ընտանիքներուն:
Ծանօթ. Ողբացեալին մասին կարդալ այսօրուան «Մշակութային էջ»-ին մէջ:
