Կիրակի 16 Փետրուարին, Շիյահի մարզական համալիրին մէջ տեղի ունեցաւ Լիբանանի փինկ-փոնկի ֆետերասիոնի ընտրութիւնները յառաջիկայ չորս տարիներու համար:
Երիտասարդութեան եւ մարմնամարզի նախարարութեան, ինչպէս նաեւ 126 ակումբներու պատգամաւորներու ներկայութեամբ կայացած ընտրութիւնը ամփոփուեցաւ մրցակցային երկու ցանկերու միջեւ, որոնցմէ ի վերջոյ յաղթանակեց տոքթ. Փիեր Հանիի գլխաւորած ցանկը, որուն մէջ ընդգրկուած էր նաեւ Հ.Մ.Մ.-ի ներկայացուցիչ ընկերուհի Մարի-Անն Յովհաննէսեանը: Փինկ-փոնկի ֆետերասիոնի դիւանը կազմուեցաւ հետեւեալ ձեւով՝ տոքթ. Փիեր Հանի (նախագահ), Ատէլ Տամժ (փոխնախագահ), Թոնի Ֆուրսան (քարտուղար), Նաժի Հիլալ (գանձապահ), Մարի-Անն Յովհաննէսեան (հաշուապահ):
Լիբանանի հեծելարշաւի եւ թրէաթլոնի ֆետերասիոններէն ետք, ահա փինկ-փոնկի մարզէն ներս վարչական ներկայութեան ամրագրումն ալ կու գայ որպէս յաւելեալ ապացոյց Հ.Մ.Մ.-ի ծաւալած յաջողութիւններուն ու վստահութեան Լիբանանի մարզական լայն շրջանակներուն մէջ:
Հ.Մ.Մ.-ի ներկայացուցիչ ընկերուհի Մարի-Անն Յովհաննէսեան ծնած է 15 Հոկտեմբեր 1999-ին, Պէյրութ։ Աւարտած է Սահակեան-Լ. Մկրտիչեան Գոլէճը: Լիբանանի պետական համալսարանէն վկայուած է «Political and Administrative Sciences» ճիւղին մէջ, հետագային ստանալով մագիստրոսի կոչումը «Public Policies» ոլորտին մէջ:
Ներկայիս կը պաշտօնավարէ իր մայր վարժարանին՝ Սահակեանի մէջ:
Անդամ է Ս.Դ.Հ.Կ.-ի Տխրունի Ուս. Երիտ. Միութեան եւ Հայ Մարմնամարզական Միութեան վարչութիւններուն:
