Երուսաղէմի հայոց պատրիարքութիւնը ահազանգեց եկեղեցապատկան կալուածները գրաւելու իսրայէլեան մտադրութենէն՝ 1994-էն ի վեր կուտակուած պարտքերու պատճառաբանութեամբ: Ապօրինի համարելով ենթադրեալ պարտքերը, պատրիարքութիւնը նշեց, որ Երուսաղէմի քաղաքապետութիւնը կը պահանջէ վճարել տուրքեր, սպառնալով հակառակ պարագային աճուրդի հանել եկեղեցւոյ կալուածները: Պատրիարքութիւնը այս հարցով դիմած է դատարան՝ կանխելու համար քաղաքապետութեան ապօրինի գործողութիւնները: Նշենք, որ վերջին տարիներուն իսրայէլեան իշխանութիւնները սաստկացուցած են ճնշումը Հայոց պատրիարքութեան եւ քրիստոնեայ այլ եկեղեցիներու նկատմամբ:
