Ռուսիոյ նախագահ Վլատիմիր Փութին յայտնեց, որ առաջին քայլը առնուած է Միացեալ Նահանգներու հետ համագործակցութիւնը բնականոնացնելու ուղղութեամբ՝ կեդրոնանալով երկկողմանի հետաքրքրութեան բոլոր թղթածրարներուն վրայ, ներառեալ Ուքրանիոյ եւ Միջին Արեւելքի հարցերը: Փութին կառուցողական եւ բարեկամական որակեց Ռիատի մէջ գումարուած ռուս-ամերիկեան բանակցային առաջին հանդիպումը եւ դիտել տուաւ, որ Ուքրանիոյ խնդիրը կարելի չէ լուծել առանց ռուս-ամերիկեան վստահութեան ամրապնդումին: «Ուրախութեամբ պատրաստ եմ տեսակցելու ամերիկացի պաշտօնակիցիս հետ, սակայն նման հանդիպումի մը լաւ նախապատրաստուելէ ետք», ըսաւ Փութին, աւելցնելով որ Ուքրանիան ու Եւրոպան վստահաբար հեռու պիտի չպահուին բանակցութիւններէն:
