Հանրապետութեան նախագահ Ժոզէֆ Աուն հետեւեցաւ հարաւի զարգացումներուն եւ լիբանանեան բանակի տեղակայումին, այդ հարցը արծարծելով Միացեալ Նահանգներու ազգային անվտանգութեան հարցերով խորհրդական Մայք Ուալթըրի հետ: Նախագահը շեշտեց բռնագրաւեալ հինգ բլուրներէն իսրայէլեան ուժերու անյապաղ հեռացումին անհրաժեշտութիւնը եւ բոլոր գերիներուն ազատ արձակումը: Ուալթըր, իր կարգին, հաւաստիացուց, թէ Ուաշինկթըն մօտէն կը հետեւի զարգացումներուն եւ լիբանանեան հողերէն իսրայէլեան նահանջին: Ան դրուատեց լիբանանեան բանակին շարժումները, վստահեցնելով որ ամերիկեան վարչակազմը Լիբանանի կառավարութեան հետ պիտի հետեւի զինադադարի համաձայնութեան ամբողջական գործադրութեան:
Լիբանանի մէջ հաւատարմագրուած արաբ դեսպաններուն հետ տեսակցութեան ընթացքին նախագահը շեշտեց, որ լիբանանեան եւ արաբական շրջանային մարտահրաւէրները կարելի է դիմագրաւել միայն արաբական միացեալ դիրքորոշումներով: Ան հաւաստիացուց, որ Լիբանան այսուհետեւ պիտի չդառնայ արաբական երկիրները հարուածելու հաթակ, այլ պիտի վերատիրանայ իր փառքին: Աուն երէկ ընդունեց նաեւ Մարոնիթ լիկայի պատուիրակութիւնը, որուն հետ տեսակցութեան ընթացքին վստահեցուց, որ լիբանանեան որեւէ խմբաւորում անտեսուած պիտի չըլլայ, աւելցնելով որ բարեկարգումներ պիտի իրականացուին, որպէսզի Լիբանան վերատիրանայ միջազգային վստահութեան: Աուն շեշտեց սուրիացի տեղահանուածներու տունդարձին անհրաժեշտութիւնը ու վերահատատեց, թէ աւանդատէրերուն իրաւունքը պիտի չկորսուի:
