Ինչպէս կ’ակնկալուէր, հարաւային զինադադարի պայմանաժամը անցաւ առանց միջազգային հովանաւորութեամբ կնքուած զինադադարի համաձայնութեան ամբողջական գործադրութեան: Իսրայէլեան ուժերը անցնող երկու օրերուն հեռացան լիբանանեան բռնագրաւեալ գիւղերէն, սակայն տեղակայուեցան սահմանային հինգ բարձունքներու վրայ, ուրկէ հնարաւորութիւն ունին վերահսկելու թէ՛ իսրայէլեան սահմանամերձ բնակավայրերը, թէ՛ լիբանանեան բազմաթիւ քաղաքներ եւ գիւղեր, հասնելով մինչեւ Սուր, Հըզպալլայի հաւանական գործունէութեան դէմ պայքարելու պատճառաբանութեամբ: Իսրայէլեան ուժերը երէկ յաւելեալ ոտնձգութիւններ կատարեցին լիբանանեան սահմանային շրջաններուն նկատմամբ: Անոնք կրակ բացին Շըպաայի մերձակայ լիբանանեան բանակի դիրքին վրայ եւ երկու մարդ վիրաւորեցին Ուազանիի գետեզերքին, ուր գիւղ վերադարձած քաղաքացիները կը ստուգէին իրենց սեփականութիւնները: Իսկ Այթա Շաապի մէջ, իսրայէլեան անօդաչու սարք մը թիրախաւորեց ինքնաշարժ մը եւ սպաննեց վարորդը, ապա յայտարարեց, թէ գործողութեան թիրախը Հըզպալլայի զինուորական գործիչներէն մէկն էր, որ զինամթերք կը տեղափոխէր սահմանային գօտիին մէջ:
