ՍԱՄՕ ՍԱՐԳԻՍԵԱՆ (1944 – 2022)
(Կենսագրական նօթեր)
– Սամօ Սարգիսեան ծնած է Պէյրութ-Լիբանան 24 Հոկտեմբեր 1944-ին:
– Իր նախնական եւ երկրորդական ուսումը ստացած է Սահակեան վարժարանին մէջ: Լիբանանի ֆրանսական համալսարանին մէջ ուսանած է «Քաղաքական գիտութիւն» եւ «Ֆրանսական գրականութիւն»: Հայերէնագիտութեան մասնագիտութիւնը ստացած է Սէն Ժոզէֆ համալսարանի հայագիտական կաճառին մէջ: Վերջապէս Լիբանանի Պետական համալսարանին մէջ հետեւած է լրագրութեան:
– 10 տարի ուսուցչութիւն վարած է Սահակեան-Լեւոն Մկրրտիչեան վարժարանին մէջ:
– «Արարատ» օրաթերթի աշխատակից եղած է մասնաւորաբար թատերական եւ մարզական քննադատութեան ծիրէն ներս:
– 1976-ի Նոյեմբերին կը հաստատուի Պուէնոս Այրէս-Արժանթին, ստանձնելու համար «Շարժում» շաբաթաթերթի խմբագրի պաշտօնը: «Շարժում» շաբաթաթերթը Ս.Դ.Հ.Կ.-ի Հարաւային Ամերիկայի օրկանն էր: 16 տարի վարելէ ետք այդ պաշտօնը, թերթը կը դադրի լոյս տեսնելէ 1991-ին, նիւթական լուրջ պայմաններու պատճառով:
– Միեւնոյն ատեն ուսուցչութեամբ զբաղած է, նախ Պախճէճեան դպրոցին մէջ, ուր եղած է տնօրէն, յետոյ Վիսենթէ Լոփէսի Ազգային վարժարան, Ս. Գրիգոր Լուսաւորիչ վարժարան, Մխիթարեան վարժարան ուր 17 տարի երկրորդականի հայերէն բաժնի տնօրէն եւ ուսուցիչ եղած է, ինչպէս նաեւ Չննոզեան Ուսուցչանոցի դասատու:
– Յօդուածներով մասնակցած է Սփիւռքի զանազան թերթերու մէջ: Կը տիրապետէր քանի մը լեզուներու եւ հմուտ ճառախօս էր:
– Դասախօսութիւններ տուած է Պուէնոս Այրէսի, Մոնթէվիտէոյի (Ուրուկուայ), Սիտնիի (Աւստրալիա), Պէյրութի (Լիբանան), Երեւանի (Հայաստան) եւ Դամասկոսի (Սուրիա) մէջ:
– Գաղութէն ներս իր կուսակցական ղեկավարի դերէն զատ, գործօն անդամ եղած է Միջմիութենական մարմինին մէջ:
– 2015 թուականին Հնչակեան Քսան նահատակներու յիշատակին նուիրուած հանդիսութեան ընթացքին, Ս.Դ.Հ.Կ.-ի Կեդրոնական վարչութեան կողմէ պարգեւատրուած է «Փարամազ» շքանշանով:
– 2013-ին մէկ շրջան Ս.Դ.Հ.Կ.-ի Կեդրոնի անդամ եղած է:
– 1981 Դեկտեմբերին ամուսնացած է հնչակեան ուսուցչուի ընկերուհի Անի Մուշեանի հետ:
– Մահացած է 25 Յունուար 2022-ին, Պուէնոս Այրէսի մէջ:
