Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինի պատուիրակութիւն մը, գլխաւորութեամբ ատենապետ ընկ. Վանիկ Տագէսեանի, Երկուշաբթի, 17 Փետրուար 2025-ին, այցելեց նախկին վարչապետ Սաատ Հարիրիին։ Հարիրիի կեդրոնական Պէյրութի բնակարանին մէջ տեղի ունեցած հանդիպման ընթացքին քննարկուեցան լիբանանեան քաղաքական հրատապ հարցերը եւ տնտեսական բարդ իրավիճակը։
Ս.Դ.Հ.Կ.-ի Լիբանանի շրջանի Վարիչ մարմինի ատենապետ ընկ. Տագէսեան եւ նախկին վարչապետ Սաատ Հարիրի միտքեր փոխանակեցին երկիրը իր ելեւմտական ճգնաժամէն դուրս բերելու միջոցներուն շուրջ։ Կողմերը խօսեցան վերջերս Լիբանանի նոր նախագահի ընտրութեան դրական անդրադարձերուն, ինչպէս նաեւ նոր խոստումնալից կառավարութեան կազմութեան մասին։
Հանդիպման աւարտին, ատենապետ ընկ.Վանիկ Տագէսեան լրագրողներուն խօսելով՝ ըսաւ, որ «մենք ուրախ ենք նախկին վարչապետ Սաատ Հարիրիի վերադարձին առթիւ։ Հարիրիի ներկայութիւնը գալիք օրերու նոր յոյս կու տայ լիբանանցիներուն»։ Ընկեր Տագէսեան վերահաստատեց Հնչակեան կուսակցութեան եւ Մուսթաքպալ հոսանքին միջեւ գոյութիւն ունեցող բարեկամական կապերը։ Ան շեշտեց, որ Հնչակեան կուսակցութիւնը հաւատարիմ կը մնայ Լիբանանի ազատութեան, անկախութեան եւ գերիշխանութեան։
