Վարչապետ Նաուաֆ Սալամի կառավարութիւնը երէկ գիշեր ամբողջացուց աշխատանքային ծրագրին մշակումը: Տեղեկատուութեան նախարար Փօլ Մըրքոս Պաապտայի պալատին մէջ գումարուած Նախարարաց խորհուրդի նիստէն ետք յայտնեց, որ հանրապետութեան նախագահ Ժոզէֆ Աուն դրուատած է ծրագրին արագ մշակումը եւ նախարարներուն համագործակցութիւնը: Ըստ նախարարին, աշխատանքային ծրագիրը կը շեշտէ լիբանանեան բռնագրաւեալ հողերը ազատագրելու անհրաժեշտութիւնը, ընդգծելով թէ երկրին մէջ զէնք կրելու մենաշնորհը կը պատկանի բացառաբար լիբանանեան պետական հաստատութիւններուն: Աշխատանքային ծրագիրը կարեւորած է նաեւ 1701 բանաձեւի գործադրութիւնը եւ Լիբանանը շրջանային ճակատներու բախումէն զերծ պահելու որոշումը: Նախարարները կոչ ուղղած են ընդարձակ երկխօսութիւն վարելու Սուրիոյ հետ, պահանջելով Լիբանանի հողերը չգործածել եղբայրական պետութիւններու դէմ յարձակելու նպատակով:
