Իսրայէլ զինադադարի մինչեւ վերջին ժամերը գործածեց՝ ամբողջացնելու համար պատերազմին սկսած ծրագիրը՝ Լիբանանի հարաւային սահմանամերձ շրջաններուն հիմնայատակ կործանումը: Անցնող 48 ժամերուն իսրայէլեան ուժերը նորանոր պայթումներ իրականացուցին բռնագրաւեալ Մէյս էլ-Ժապալ, Հաուլա, Քֆարքիլա, Եարուն, Ատէյսէ գիւղերուն մէջ՝ կործանելով յաւելեալ բնակարաններ եւ այլ կառոյցներ: Իսրայէլեան խախտումներուն աշխարհագրութիւնը երէկ հասաւ Սայտա, ուր ռազմական օդանաւ մը քաղաքի գլխաւոր պողոտային վրայ թիրախաւորեց ինքնաշարժ մը, սպաննելով մարդ մը ու վիրաւորելով երկու ուրիշներ: Քաղաքացիական անվտանութեան կամաւորներն ու բանակէն շրջուն ջոկատներ շուտով հասան միջադէպի բեմավայր եւ հրկիզուած ինքնաշարժէն դուրս բերին Լիբանանի մէջ Համասի գլխաւոր պատասխանատուներէն Մոհամմատ Շէհինի մարմինը: Իսրայէլեան բանակի բանբերը ստանձնեց գործողութեան պատասխնատուութիւնը եւ նշեց, թէ ահաբեկուած մարդը Լիբանանի մէջ Համասի գործողութիւններու բաժնի պատասխանատուն է: Ըստ իսրայէլեան կողմին, Մոհամմատ Շէհին Իրանի ցուցմունքներով եւ ֆինանսաւորումով լիբանանեան հողերէն յարձակումներ ծրագրած եւ իրագործած էր իսրայէլեան սահմանամերձ բնակավայրերուն ուղղութեամբ: Իսրայէլի վարչապետ Պենիամին Նեթանիահու, իր կարգին, յանձնառութիւն յայտնեց զինադադարին եւ լիբանանեան կառավարութենէն պահանջեց գործադրել պայմանաւորուածութիւնները, շեշտելով Հըզպալլան ապազինելու առաջնահերթութիւնը:
